Kryeministri i Kosovës në dorëheqje, Ramush Haradinaj ka kujtuar në tetë vjetorin e rënies, pjestarin e Njësisë Speciale, Enver Zymber, raporton Gazeta Express.
Përmes një shkrimi në Facebook, Haradinaj ka thënë se tetë vite më parë, ka rënë një nga policët më të mirë të Kosovës, duke mbrojtur sovranitetin e vendit.
“Sot e tetë vite më parë, një nga policët më të mirë të Kosovës, Enver Zymberi, pjesëtar i Njësisë Speciale, ra heroikisht në mbrojtje të sovranitetit të vendit, të qytetarëve pa dallim etnie, të rendit dhe ligjit.
Duke e kujtuar veprën kulmore të tij, sot nderojmë secilin polic të Kosovës, që kanë dëshmuar profesionalizëm të lartë në kryerjen e detyrave, në mbrojtje të rendit dhe ligjit në gjithë territorin e Republikës së Kosovës, në Jug e në Veri”, ka shkruar ai.
Tutje, kryeministri në dorëheqje, tha se angazhimi i policisë së Kosovës po e bën Kosovën më të sigurtë.
“Ky angazhim dhe përkushtim i tyre, e bën Kosovën vend të sigurt, për të gjithë qytetarët në çdo pëllëmbë të saj. Falënderoj zyrtarët policorë, Drejtorin Rashit Qalaj, për angazhimin e pakursyer, për t’i dalë zot Kosovës”, shkroi Haradinaj./GazetaExpress/