Militantët e Shtetit Islamik (ISIS), të kyçur në beteja me forcat e sigurisë nëpër rrugët e një qyteti jugor të Filipineve, i kanë vrarë 19 civilë, njofton Ushtria e Filipineve, duke e çuar numrin zyrtar të të vdekurve në të paktën 85 në gati një javë luftime.
Dhuna e ka shtyrë presidentin e vendit, Rodrigo Duterte, që të shpallë ligjin ushtarak nëpër jug të Filipineve për të shuar kërcënimin në rritje të militantëve të lidhur me grupin e Shtetit Islamik, transmeton Express.
Autoritetet thanë se militantët i kanë vrarë 19 civilë në Marawi, një qytet i banuar kryesisht me myslimanë, që numëron 200 mijë banorë. Në mesin e të vdekurve ishin tri gra dhe një fëmijë.
“Këta janë civilë, gra. Këta terroristë janë kundër-njerëzor. I gjetëm trupat e tyre teksa po kryenim operacione të shpëtimit,” ka thënë zëdhënësi rajonal i ushtrisë, koloneli Jo-ar Herrera.
Ai ka shtuar se ushtrua ende nuk i ka hetuar rastet e vdekjeve të raportuara./Express/