Drejtori i të ashtuquajturës Zyra për Kosovën në qeverinë e Serbisë, Marko Gjuriq, ka komentuar deklaratën e kryeministrit të Kosovës, Ramush Haradinaj, i cili ka thënë se gjatë vitit të ardhshëm nuk do të ketë kufi fizik mes Kosovës dhe Shqipërisë.

Sipas Gjuriq, ky është provokimi i radhës në llogari të Serbisë dhe liderëve të saj të cilët sipas tij janë duke u munduar të gjejnë një zgjidhje për Kosovën, transmeton Telegrafi.

Ai ka shtruar një pyetje për Federica Mogherini, Maja Kocijancic dhe “të gjithë tjerë në BE” – a do të reagojnë në çfarëdo mënyrë për kërcënimet e Prishtinës që sipas tij “kërcënojnë paqen dhe stabilitetin në këtë pjesë të Evropës”.

“Brukselit do t’i duhet paksa të presë që ta shohë sërish presidentin e Serbisë, Aleksandar Vuçiq, për faktin se nuk ka mbështetje ideja e tij për zgjidhjen e çështjes së Kosovës dhe marrëdhënieve mes shqiptarëve dhe serbëve”, ka shtuar Gjuriq.

Ai këto komente i bëri gjatë konferencës për media, kur është pyetur nëse do të ketë vazhdim të dialogut mes Kosovës dhe Serbisë.

Gjuriq gjithashtu tha se në tetor do të mbahet mbledhja e përbashkët mes qeverisë serbe dhe përfaqësuesve serbë nga Kosova, ku do të finalizohet plani për investime në komunat me shumicë serbe. /Telegrafi/