Qeveria gjermane ka thënë sot se e ka marrë seriozisht publikimin e mijëra faqeve të diskutimeve të brendshme të CIA-s nga grupi anti-fshehtësi, Wikileaks.
Megjithatë, ka thënë se nuk ka mundur ta verifikojë nëse ato dokumente janë të vërteta, transmeton Express.
Mediat gjermane i kanë futur në dorë dokumentet më të fundit të publikuara nga Wikileaks, të cilat tregojnë se CIA e kishte përdorur konsullatën amerikane në Frankfurt si një bazë të madhe të largët për hakerim.
Një zëdhënës i Ministrisë së Jashtme të Gjermanisë ka thënë se qeveria e vendit është në kontakt me autoritetet amerikane rreth kësaj çështjeje.
