Gaza po i afrohet një ndërprerjeje pothuajse totale të internetit pasi rajoni pësoi humbjen më të madhe në komunikim sot që nga fillimi i luftimeve më 7 tetor.

Operatori i fundit i madh i internetit në rajon, Paltel, pësoi dëmtime në rrugët e tij ndërkombëtare, sipas NetBlocks, një firmë monitoruese e ndërprerjeve të internetit me qendër në Londër, shkruajnë mediat e huaja, përcjell Telegrafi.

Si pasojë, shumë palestinezë po përjetojnë një humbje totale të qasjes në internet dhe aftësisë për të komunikuar në mënyrë elektronike, sipas të dhënave, ndërsa disa mund të kenë shumë pak lidhje.

Ndërsa Jawwal, një tjetër kompani palestineze e telekomit që ofron shërbime celulare për Rripin e Gazës, gjithashtu lëshoi një deklaratë të premten, duke thënë se “bombardimi intensiv në orën e kaluar ka rezultuar në shkatërrimin e të gjitha rrugëve ndërkombëtare të mbetura që lidhin Gazën me botën e jashtme” duke çuar në një “ndërprerje të plotë të shërbimeve të telekomunikacionit”.

Lidhjet me internetin ka të ngjarë të përkeqësohen pasi Forcat e Mbrojtjes të Izraelit njoftuan “për operacionet e tyre tokësore në zgjerim”.

Ndërkohë bëhet e ditur se ata me karta SIM izraelite ose ndërkombëtare po raportojnë se disa kanë qasje në internet.

Një gjë e tillë mund të konfirmohet edhe nga deklaratat e disa agjencive të Kombeve të Bashkuara që raportojnë se kanë humbur kontaktet me stafin e tyre lokal në Gaza, pasi shumica e aftësive të komunikimit duket se janë ndërprerë.

Drejtori i Përgjithshëm i Organizatës Botërore të Shëndetësisë, Tedros Adhanom Ghebreyesus tha në X se organizata ka humbur kontaktet me stafin e saj, si dhe me “objektet e saj shëndetësore, punonjësit shëndetësorë dhe pjesën tjetër të partnerëve tanë humanitar në terren”.

E Lynn Hastings, rezidente e Kombeve të Bashkuara dhe koordinatore humanitare në Palestinë, gjithashtu tha në X se “Gaza ka humbur kontaktet me botën e jashtme mes raporteve për bombardime të intensifikuara”. /Telegrafi/