Policia e Kosovës ka njoftuar se emisari amerikan, Gabriel Escobar gjatë vizitës së tij në Kosovë, ai kërkoi për tu takuar me të venë dhe djemtë e rreshterit të vrarë Afrim Bunjaku.

Sipas njoftimit thuhet se në takim ishte i pranishëm edhe Drejtori i Përgjithshëm i Policisë së Kosovës, Gazmend Hoxha.

“ZNS Escobar, në prani të Ambasadorit të SHBA-së Jeffrey Hovenier, dhe Atasheut të DOJ-ICITAP-it Kimberly Riffe, shprehu ngushëllimet e tij të sinqerta familjes për humbjen tragjike të babait/bashkëshortit të tyre. Ngjarja ishte shumë emocionuese dhe e përzemërt dhe personalitetet e larta i shprehën ngushëllimet e tyre familjes dhe Policisë së Kosovës”, thuhet në njoftim.

Tutje në njoftim thubet se në një takim të veçantë, Hoxha informoi Escobarin dhe atasheun Riffe për sulmin ndaj policisë në Banjskë më 24 shtator 2023, ku mbeti i vrarë rreshteri Bunjaku, dhe situatën aktuale të sigurisë në pjesën veriore të Kosovës.

“ZNS Escobar vlerësoi mundësinë për të komunikuar drejtpërdrejt më kreun e Policisë së Kosovës. Hoxha përcolli mirënjohjen e tij të thellë për Shtetet e Bashkuara dhe stafin e shumtë të ambasadës që ndihmojnë policinë dhe janë të përkushtuar për të vazhduar bashkëpunimin e tyre të shkëlqyer”, thuhet në njoftim. /Telegrafi/