Kënga e Editës titullohet “I’m Better” dhe është një këngë e lehtë me ritme verore. Ajo ka treguar gjithashtu se në fund të vitit do të vijë me një baladë, kurse sa i përket bashkëpunimeve me këngëtaret tjerë të estradës, Edita tregon se nuk ka menduar ende të ketë bashkëpunime me askënd. “Pas lansimit të kësaj kënge, në fund të vitit do të vij me një baladë ndërsa për bashkëpunime nuk kam biseduar me asnjë nga kolegët e mi, mirëpo nuk e përjashtoj mundësinë që të vij me një duet”, ka theksuar Edita.
Ajo ka treguar se nuk është edhe aq e angazhuar me koncerte në trojet shqiptare dhe se verën e ka shfrytëzuar më shumë për pushim. E pyetur për jetën private, Edita thotë së nuk ka ndryshuar ende asgjë dhe statusi i saj vazhdon të jetë beqare. “Nuk ka asgjë të re, vazhdoj të jem beqare” ka shtuar Edita.
Nuk është kundër operacioneve plastike
Ndonëse çdo artist pretendon që të gëzojë famë sa më të madhe, madje disa prej tyre edhe janë në gjendje të bëjnë gjithçka vetëm për të arritur te fama, për Editën kjo gjë nuk ka fare rëndësi dhe thotë se nuk është e gatshme që për famë të bëjë gjithçka “Jo, unë nuk kisha bërë gjithçka për famë, unë punën time si këngëtare e bëj që publiku të ndjehet mirë kur më dëgjon dhe mendoj që ekzistojnë disa gjëra nuk duhet bërë për famë” ka shtuar Edita.
Ajo ka folur edhe për operacionet plastike për të cilat nuk është kundër por thotë se nuk ka menduar asnjëherë të bëjë operacion plastik pasi që është e kënaqur me dukjen e saj. “Jam e kënaqur me dukjen time dhe asnjëherë nuk më ka shkuar ndërmend që të bëjë ndonjë operacion të tillë por nëse ndonjëherë kam ndonjë problem atëherë patjetër se do ndërmerrja një operacion plastik” ka theksuar Sopjani.
Përveç që merret me muzikë, Edita ka edhe një tjetër karrierë, ajo ka përfunduar studimet në Komunikim Masiv dhe Gazetari dhe për momentin është edhe redaktore në sektorin e muzikës në dy televizione private. “Momentalisht jam duke punuar si redaktore e muzikës në dy televizione private pasi për këtë drejtim edhe kam studiuar” ka theksuar Edita. Ajo po merret edhe me fitnes ku kalon një pjesë të ditës.