Policia e EULEX-it ka arrestuar Radomir Kasaloviq, i dyshuar për vrasjen policit Enver Zymberi. Arrestimi ka ndodhur pasi që, Kasaloviq është vetë-dorëzuar në një vend afër Zubin Potokut.

Serbi Radomir Kasaloviq, i akuzuar për vrasjen e policit Enver Zymberi në vitin 2011, është dorëzuar sot në mëngjes tek policia e EULEX-it.

Dorëzimi i Kasaloviqit është bërë në një vend afër qytetëses së Zubin Potokut në veri të Kosovës, raportojnë mediat serbe.

Nga EULEX-i bëhet e ditur që Kasaloviq i është dorëzuar policisë dhe se është burgosur në një bazë logjistike të EULEX-it, pa përdorim të dhunës. Në këtë vend, Kasaloviq do të merret në pyetje nga një prokuror ndërkombëtar nga Prokuroria Themelore e Mitrovicës, transmeton lajm.net

Akuzat kanë të bëjnë me vrasjen e policit të Kosovës, Enver Zymberi më 26 korrik të vitit 2011, gjatë aksionit policor në veri të vendit.

Lidhur me sulmin në konvojin e Policisë së Kosovës, akuzohen 6 qytetarë të nacionalitetit serb, për të cilët është shpërndarë një urdhër-arrest ndërkombëtar.

Kasaloviq përballet me akuzën për vrasje të rëndë, tentim të vrasjes, armëmbajtje pa leje dhe pengim të personave zyrtar gjatë detyrës.