Një baba i gjashtë fëmijëve është detyruar të ikë nga shtëpia për herë të dytë dhe druhet për sigurinë, si pasojë e “shtatë viteve përndjekje” pasi që është konvertuar nga Islami në Krishterim.
Nissar Hussain, i cili në vitin 2008, ishte pjesë e një dokumentari të “Channel 4 TV”, për keqtrajtimin e myslimanëve të konvertuar në të krishterë, u shtrua në spital vitin që shkoi pas një sulmi brutal që u kap nga kamerat e sigurisë në nëntor, transmeton Express.
Dy burra të mbuluar me kapuç, njëri i armatosur me bisht kazme, e sulmuan, duke i shkaktuar lëndime dhe thyerje.
Hussain, i cili është 50-vjeçar, ka një vit që ka planifikuar të largohet bashkë me familjen nga shtëpia në Brandford, Angli. Ai u largua këtë javë nën përcjelljen e policisë.
Ai ka thënë se “përndjekja ekstreme” e ka shkatërruar familjen e tij.
“Familja ime është e shqetësuar dhe tejet e traumatizuar se po largohemi,” ka thënë ai.
“Por, kur jetën e ke në rrezik, atëherë nuk ke zgjidhje tjetër,” shtoi ai.
Hussain u konvertua në të krishterë para 20 viteve, por thotë se në vitet e fundit ka qenë subjekt i ngacmimeve dhe sulmeve të dhunshme nga një pjesë e komunitetit islamik, pas transmetimit të dokumentarit./Express/
