Ish kryeministri i Shqipërisë, Sali Berisha ka përshëndetur Kosovën në shtatë vjetorin e Pavarësisë duke kujtuar ata qindra burra e gra që luftuan për lirinë dhe pavarësinë e këtij kombi të vuajtur.

Berisha, përmes një postimi në Facebook, tha se ndihet i privilegjuar që shumicën e këtyre heronjve ka pasur fatin t’i takojë personalisht, ndërsa përshëndeti dhe vlerësoi ceremoninë e organizuar nga presidenti Nishani për dekorimin e heronjve të luftës së Kosovës.

“Ne sot ju detyrojmë atyre lirinë tonë kombëtare! Ata dhe qindra e mijëra luftëtarë të tjerë të lirisë firmosën me sakrificën e tyre sublime projektin e madh të qytetarëve, të presidentit Rugova dhe Komandantit legjendar Adem Jashari, të Pavarësisë së Kosovës. Zoti i bekoftë të rënët për lirinë tonë kombëtare”, ka shkruar Berisha.

Ai i ka cituar vargjet e Agim Ramadanit: “Mu shterrshin sytë nëse pushoj/ Lirinë tënde me ëndërrue/ mallkue qoftë gjaku im/ nëse m’vrasin pa luftue”.