Zgjedhjet do t’i japin një rast të mirë partisë së ekstremit të djathtë, Partisë së Lirisë (FPO), për të hyrë në qeverinë nacionale më pak se një vit pasi kandidati i saj e humbi një luftë të ngushtë në balotazhin presidencial, transmeton Express.

FPO është duke udhëhequr në sondazhe, para Social Demokratëve të Kernit. Por, sondazhet po ashtu sugjerojnë se partia e konservatorëve, Partia e Popullit, do të dalë e para nëse ministri aktual i Jashtëm i vendit, Sebastian Kurz, emërohet lider i saj, siç edhe pritet.

“Përfundimisht do të ketë zgjedhje, dhe them se në vjeshtën që po vjen,” ka thënë Kern në një intervistë për ORF TV.

Deri më tani ai i kishte rezistuar idesë për zgjedhje të parakohshme, duke i bërë thirrje koalicionit që të punonte deri në përfundim të mandatit pas një viti.

Ndërkohë Kurz, 30-vjeçar, është yll në politikën e Austrisë i cili shihet si shpresa më e mirë e partisë së vet për t’ia ringjallur të ardhmen. Lideri aktual i Partisë së Popullit, Reinhold Mitterlehner, njoftoi të mërkurën e kaluar se do të japë dorëheqje, kryesisht për shkak të pamundësisë për t’i ndalur mosmarrëveshjet  në mesin e ministrave të tij.

Kurz ka thënë të premten se dëshiron zgjedhje të parakohshme, por se do ta pranonte postin e liderit të Partisë së Popullit vetëm nëse do të kishte edhe pushtet të ri të zgjedhuar në çështjet, përfshirë dhe personelin./Express/