Presidenti i zgjedhur amerikan, Donald Trump, planifikon që t’i shfuqizojë një varg veprimesh dhe rregulloresh ekzekutive të presidentit Barack Obama, qysh në ditën e parë si president, ka thënë sekretari në ardhje për media në Shtëpinë e Bardhë, Sean Spicer.
Spicer, i cili do të jetë sekretar për media i Trumpit në Shtëpinë e Bardhë, ka thënë për ABC: “Trump menjëherë do t’i shfuqizojë shumë rregullore dhe veprime që janë ndërmarrë nga kjo administratë [e Obamas] gjatë tetë viteve të fundit, të cilat e kanë penguar rritjen ekonomike dhe hapjen e vendeve të reja të punës,” transmeton Express.
Spicer ka thënë se kjo është njëra nga dy veprimet që Trump do t’i bëjë menjëherë sapo të betohet si president.
Por, ai nuk e ka specifikuar se cilat veprime ekzekutive do t’i shfuqizojë Trumpi./Express/
