Depozitat me afat në lekë të individëve kanë vijuar tendencën e tyre rënëse edhe në muajin korrik, teksa klientët janë në kërkim të alternativave më fitimprurëse për kursimet e tyre.

Sipas statistikave të Bankës së Shqipërisë, stoku i depozitave me afat në lekë të rezidentëve, që zë 31% të totalit të depozitave në vend, arriti në 306 miliardë lekë në korrik, me një tkurrje prej gati 4 miliardë lekë (28 milionë euro) vetëm për një muaj.

Në krahasim me fundin e 2015-s, depozitat me afat të individëve janë ulur me rreth 125 milionë euro, sipas statistikave të Bankës së Shqipërisë.

Nuk ka të dhëna të sakta se ku kanë shkuar këto para, teksa konsumi vijon të mbetet anemik. Të dhënat paraprake flasin se një pjesë e këtyre kursimeve kanë kaluar në maturitete afatgjata, ose në fondet e investimeve, ndërsa 1 milion euro janë investuar në bursat online, sipas të dhënave nga Autoriteti i Mbikëqyrjes Financiare.

Nga maji i vitit 2013, kursimet e individëve në lekë janë ulur vazhdimisht, në të njëjtën linjë me uljen e interesave të depozitave në lekë. Norma mesatare e interesit të depozitave me afat ishte vetëm 0.78% në korrik, nga 4.28% në maj 2013.

Në total, stoku i depozitave arriti në 980 miliardë lekë në korrik, me një rritje të lehtë me 0.3% në raport me muajin e mëparshëm.  Me bazë vjetore (korrik 2016/korrik 2015) rritja e depozitave është vetëm 1.2%./Monitor