Komuna e Lipjanit është përzgjedhur në mesin e tri komunave të Kosovës si pilot komunë nga Helvetas Swiss Intercooperation- projekti Demos, për asistencë në programin “Përkrahja e Demos për komunat në zbatimin e ligjit/Vendosjen e rendit komunal në fushën e hapësirave publike”.
Me këtë rast, Kryetari i Komunës së Lipjanit, Imri Ahmeti, gjatë ditës së sotme ka zhvilluar një takim me përfaqësuesit e projektit Demos, me të cilët kanë bashkëbiseduar për hapat konkret për fillimin e këtij programi. Ai po ashtu ka njoftuar të pranishmit për formimin e grupit punues, grupit drejtues si dhe caktimin e disa zyrtarëve të tjerë për mbikëqyrjen e projektit dhe qëndrueshmërinë e tij. njoftoi Komuna e Lipjanit.
Ndërsa, Përfaqësuesi nga Helvetas – Demos Jesper Elias Lauridsen, ka prezantuar analizën për zbatim të Ligjit në vendosjen e rendit komunal në fushën e hapësirave publike.
Po ashtu në këtë takim u tha se Komuna e Lipjanit e ka bazën e mirë ligjore për fillimin e implementimit të këtij programi pasi që ka të aprovuar Rregulloren për Shërbime Publike dhe Rendin Komunal si dhe Rregulloren për Menaxhimin e Mbeturinave në Territorin e Komunës së Lipjanit
Në kuadër të këtij programi, Demos do të angazhohet me ekspertët e vet në hartimin e rregulloreve dhe procedurave tjera operacionale, zhvillimin e kapaciteteve të inspektoratit komunal.