Ministri i Punëve të Jashtme të Kosovës, Enver Hoxhaj gjatë vizitës në Guyana, ka takuar ndaras dy kryeministra të vendeve të Karaibeve që ende nuk e kanë njohur pavarësinë e Kosovës.

“Hoxhaj gjatë takimit me kryeministrin e St. Vincent dhe Grenadines, Ralph Gonzalves ka shtruar nevojën e njohjes dhe të përafrimit të marrëdhënieve mes dy vendeve duke e informuar në detaje për zhvillimet në Kosovë.

Lobimi për njohje, ka qenë fokus edhe i takimit tjetër të ministrit Hoxhaj me kryeministrin e Saint Lucia, Allen Chastanet, në margjina të Samitit të Caricomit që po mbahet në Guyana të Amerikës Latine”, thuhet në njoftimin për media.

“Kam zhvilluar dy takime shumë domethënëse për Kosovën dhe shtetësinë e saj. Jam optimist se gjërat do të lëvizin në drejtimin e duhur për njohje dhe Kosova çdo ditë po përfiton miq në të katër anët e botës. Është me rëndësi që të hapim sa më shumë dyer jashtë edhe kur ndonjëherë përballemi me pengesa e sfida dhe dyer që nuk hapen lehtë”, ka deklaruar ministri Hoxhaj pas takimeve.

Kryediplomati kosovar ka udhëtuar për në Guyana, pas pjesëmarrjes në Samitin e Liderëve të Ballkanit Perëndimor në Paris si dhe në takimin e ministrave të Jashtëm./Telegrafi/