Liderët institucionalë janë të vendosur për themelimin e Asociacionit të Komunave me shumicë Serbe, i cili, sipas tyre, do të bëhet krejtësisht sipas Kushtetutës së Kosovës. Presidenti i Kosovës Hashim Thaçi dhe kryeministri Isa Mustafa kanë deklaruar se shumë shpejt do të themelohet komisioni, i cili do ta hartojë statutin e AKS-së, pas të cilit edhe do të funksionalizohet Asociacioni.

Kryeministri i Kosovës Isa Mustafa edhe një ditë më parë tha se me ligjin për ratifikim të marrëveshjes së parë ndërkombëtare Kosova ka marrë për obligim ta themelojmë këtë Asociacion.

“Asociacioni do të themelohet në harmoni të plotë me vendimin e Gjykatës Kushtetuese të Kosovës”, deklaroi mes tjerash kryeministri. Madje, Mustafa e Thaçi kanë paralajmëruar që në Komisionin që do të hartojë statutin e ASK-së, do të përfshihen të gjitha palët, përfshirë edhe opozitën.

Por, kategorike kundër themelimit të Asociacionit janë partitë opozitare të cilat thonë se do ta kundërshtojnë në çdo mënyrë.

Zëdhënësi i Lëvizjes “Vetëvendosje”, Frashër Krasniqi, thotë për gazetën “Zëri” se nuk ka asnjë kuptim që të themelohet kurrfarë komisioni për hartimin e statutit të Asociacionit, sepse s’ka nevojë fare për themelimin e AKS-së. /Zëri/