Dy partitë politike që kanë reflektuar viteve të fundit, rivalitetin më të madh të urrejtjes ndërpartiake, AAK dhe PDK, duket se e kanë shkrirë “akullin”.

Largimi i Hashim Thaçit nga kreu i partisë dhe ardhja e Kadri Veselit, duket se ka “zbutur” Aleancën e Ramush Haradinajt, e cila po bën kalkulime që në zgjedhjet e ardhshme të krijohet një koalicion me partitë e luftës, shkruan “Zëri”.

Deri më tani, partia e Ramush Haradinajt, Aleanca për Ardhmërinë e Kosovës, kishte vija të kuqe për Partinë Demokratike të Kosovës, por që tani ka ndryshuar kurs, duke shprehur gatishmërinë që të bashkëpunojë me partinë e Kadri Veselit.

Arsyeja pse AAK-ja ka hequr vijat e kuqe është ikja e Hashim Thaçit, që konsiderohej një politikan ngucakeq.

Se, një koalicion mes këtyre dy partive është i mundshëm e pranojnë edhe vetë zyrtarë të dy subjekteve politike, duke thënë se nuk është koha që të ketë vija të kuqe për atë apo këtë parti.

Ndonëse, partia e Haradinajt shprehet kundër koalicionit me PDK-në dhe LDK-në aktualisht, por nuk e ka mohuar këtë gjë pas zgjedhjeve, që ata po i kërkojnë të parakohshme. /Zëri/