Kryetari i Komunës së Lipjanit, z. Imri Ahmeti dhe përfaqësuesi i organizatës ”Help-Hilfe zur Selbsthilfe”, z. Rrezart Shala kanë nënshkruar marrëveshje bashkëpunimi me qëllim të zbatimit të projektit “Përfshirja dhe Fuqizimi Ekonomik në Ballkanin Perëndimor”, i financuar nga qeveria gjermane dhe zbatuar nga Help, njofton Komuna e Lipjanit,

Kryetari Ahmeti ka falënderuar organizatën “Help” që ka përzgjedhur Komunën e Lipjanit për implementimin e këtij projekti që ka për qëllim mbështetjen në zhvillimin e ndërmarrësisë dhe bizneseve të vogla të komunës sonë.

“Padyshim se një projekt i tillë siç është ky që po e nënshkruajmë sot, nxit punësimin dhe zhvillimin ekonomik në komunën tonë, prandaj, Komuna e Lipjanit është gjithmonë e gatshme për bashkëpunim në realizimin e projekteve të ngjashme”, është shprehur kryetari Ahmeti.

Në kuadër të këtij projekti do të përkrahen së paku 20 përfitues në qëllimet e tyre për fillimin apo zhvillimin e aktivitetit biznesor, duke dhuruar pajisje, organizimin e trajnimeve të biznesit dhe trajnimeve të tjera profesionale sipas nevojave të klientëve, si dhe monitorim dhe mbikëqyrje, me qëllim të zhvillimit të tyre të qëndrueshëm.

Vlera e përgjithshme e projektit në total është 107.875,00 euro.