Kryetari i Komunës së Lipjanit Imri Ahmeti, sot ka pritur në takim Gerhard Schaumberger, drejtor i Caritasit në Kosovë, me të cilin kanë nënshkruar marrëveshje bashkëpunimi për implementimin e projektit “Ndikimi i Rinisë në Mjedis”, i cili do të implementohet në tri shkollat e mesme të Komunës së Lipjanit.

Kryetari Imri Ahmeti, ka falenderuar përfaqësuesit e Caritasit zviceran në Kosovë për bashkëpunimin në drejtim të realizimit të këtij projekti mjedisor e të rëndësishëm për Komunën e Lipjanit, në të njejtën kohë Kryetari Ahmeti u ka ofruar gjithë mbështjen insitucionale në zbatimin e këtij projekti të përbashkët, njofton Komuna e Lipjanit.

Nga ana tjetër, Gerhard Schaumberger, drejtor i Caritasit në Kosovë, ka vlerësuar lartë bashkëpunimin me Drejtoratin e Arsimit në Komunën e Lipjanit për kontributin e dhënë në implementimin e këti projekti ku do të përfitojnë, nxënësit, mësimdhënsit, shkollat e mbi të gjitha ambienti.

Qëllimi kryesor i projektit është të ndërmerren veprime konkrete ndaj ndryshimeve klimatike dhe të përmirësohet mbrojtja e mjedisit në përmes angazhimit aktiv të të rinjve, duke themeluar dhe fuqizuar klubet ekologjike (Eko –klubet) në tri shkollat e mesme të Lipjanit në mënyrë që të fillojnë me hartimin e projekteve të tyre, projekte këto që do të shpërblehen në kuadër të këtij programi.