Kryetari i Prishtinës, Përparim Rama ka reaguar pas rastit tragjik ku një grua shtatzënë është vrarë nga ish-bashkëshorti i saj, para objektit të Gjinekologjisë në Prishtinë

Rama përmes një postimi në Facebook, ka thënë se nga ky rast ka mbetur thellësisht i tronditur.

“Jam thellësisht i tronditur nga ngjarja që ka ndodhur sonte në Prishtinë, në oborrin e Klinikës Gjinekologjike, ku një grua e re që priste të bëhej nënë, u vra bashkë me foshnjën e saj ende të palindur”, ka shkruar ai.

Më tutje, ai shtoi se “ky është rasti i dytë i vrasjes së grave brenda një jave dhe kjo situatë duhet të trajtohet si alarmante nga institucionet e sigurisë dhe të drejtësisë”.

“I shpreh ngushëllime të thella familjes së viktimës duke shpresuar se ky do të jetë rasti i fundit i dhunës e vrasjes së grave në Kosovë” përfundoi Rama.