Një muaj më parë, më 24 shkurt pas orës 4:45 të mëngjesit me orën e Kievit, nisi agresioni i Rusisë mbi Ukrainën, kur presidenti rus Vladimir Putin doli në televizion për të njoftuar atë që ai e quajti një “operacion special”. Fjalimi i tij u pasua menjëherë nga sulmet me raketa në qytetet kryesore të Ukrainës, duke përfshirë Kievin, dhe sulme me shumë drejtime drejt Kievit, Kharkiv, Chernihiv, Sumy, Kherson dhe Mariupol.
Që atëherë, sipas Pentagonit, forcat ruse kanë lëshuar më shumë se 1100 raketa në territorin ukrainas.
Rusia ka bombarduar qytetet e Ukrainës, të mëdha dhe të vogla, duke detyruar mbi 10 milionë ukrainas të largohen nga shtëpitë e tyre, me 6.5 milionë të zhvendosur brenda vendit dhe 3.6 milionë të shkojnë jashtë vendit, sipas Kombeve të Bashkuara, shkruan KyivIndependent, transmeton Gazeta Express.
Forcat ruse kanë rrethuar disa qytete ukrainase, kanë sulmuar korridoret humanitare të miratuara për evakuim dhe kanë kryer mizori të shumta ndaj civilëve, të cilat kanë tronditur kombin ukrainas.
Të paktën 977 civilë u vranë dhe 1,594 u plagosën, sipas OKB-së, por shifrat aktuale besohet të jenë dukshëm më të larta. Sipas autoriteteve lokale në Mariupol, një qytet port i rrethuar në Ukrainën juglindore, vetëm në qytet u vranë mbi 2000 banorë. Lufta e Rusisë mori jetën e të paktën 128 fëmijëve dhe plagosi të paktën 172 fëmijë të tjerë, sipas Zyrës së Prokurorit të Përgjithshëm.
Infrastruktura civile është dëmtuar në të gjithë vendin. Rreth 4,431 ndërtesa banimi, 548 shkolla dhe 135 institucione të kujdesit shëndetësor u shkatërruan pjesërisht ose plotësisht, sipas Grupit Këshillues Ligjor të Ukrainës.
