Marcelo iu bashkua skuadrës së Real Madridit për të udhëtuar drejt Londrës për ndeshjen e kthimit gjysmëfinale në Ligën e Kampionëve, pasi u lirua nga detyra si vëzhgues në zgjedhjet lokale në Madrid.
Ai u lirua vetëm pasi një plakë u paraqit vullnetare për ta zëvendësuar mbrojtësin brazilian si vëzhgues i zgjedhjeve, raporton Gazeta Express.
Marcelo ishte paraqitur në punë si vëzhgues në një qendër votimi në zgjedhjet lokale në Madrid, duke e përmbushur obligimin e tij të martën në mëngjes.
Druhej se Real Madridit do t’i mungonte mbrojtësi anësor në ndeshjen e kthimit gjysmëfinale në Ligën e Kampionëve kundër Chelseat të mërkurën mbrëma, nëse klubi nuk e arsyeton mungesën e tij nga puna në zgjedhjet lokale në Madrid.
Marcelo ishte thirrur të punojë si monitorues i zgjedhjeve të 4 majit në një qendër votimi në Madrid, në ditën kur skuadra e Madridit do të udhëtonte drejt Londrës.
Sipas mediave spanjolle, Marcelo u paraqit në punë në qendrën e votimit rreth orës 8:30, duke e përmbushur obligim e tij.
Pak orë më vonë, ai u lirua nga detyra pasi në vend të tij në punë u paraqit një zonjë e moshuar, sipas mediave në Madrid.
Prandaj, Marcelo iu bashkua skuadrës dhe udhëtoi drejt Londrës mëngjesin e sotëm. /Gazeta Express/
