Virusi i rrezikshëm i Ebolas tashmë ka arritur në qytetin kongolez, Goma, i cili ka dy milionë banorë dhe shërben si urë lidhëse për transport në pjesën qendrore të Afrikës.

Ministria e Shëndetësisë e Kongos tha se një burrë, që shkoi për t’u kontrolluar në një qendër rajonale, është dërguar shpejt në një qendër për trajtimin e Ebolas.

Autoritetet thanë se i kanë gjetur të gjithë udhëtarët që kanë udhëtuar me të njëjtin autobus me personin e infektuar, i cili vinte nga qytetit i Butembos, ku numri i rasteve me këtë virus është mjaft i madh.

“Për shkak të shpejtësisë së identifikimit dhe izolimit të pacientit dhe identifikimit të të gjithë bashkudhëtarëve, rreziku i përhapjes së virusit në pjesën tjetër të qytetit është i vogël”, thuhet në deklaratën e Ministrisë së Shëndetësisë.

Nga ky virus kanë vdekur më shumë se 1600 persona në Kongo, ndërsa 700 të tjerë janë shëruar. Sipas statistikave zyrtare, deri tash me këtë sëmundje janë infektuar rreth 2400 njerëz. Vetëm fundjavën e kaluar u konfirmuar 12 raste të reja dhe 10 persona humbën jetën.

Zyrtarët kongolezë bënë thirrje për marrjen e masave parandaluese, përfshirë pastrimin e shpeshtë të duarve dhe shmangien e kontaktit me të gjithë personat që dyshohen se janë të infektuar me këtë virus, shkruan “The Guardian”, transmeton Gazeta Express.