Pas Indonezisë dhe Kinës, edhe Australia dhe Singapori i kanë anuluar të gjitha fluturimet që janë paraparë të kryhen me aeroplanët e tipit “Boeing 737 Max”, të cilët janë modeli i fundit i prodhuesit amerikan. Këto vendime janë marrë për shkak të dy aksidenteve ajrore brenda pesë muajsh me aeroplanët e këtij modeli.
Rrëzimi i aeroplanit “Boeing 737 Max” në Etiopi ka bërë që vlera e prodhuesit në treg të bie shumë. Vlera e aksioneve të kompanisë ka rënë për 5 për qind vetëm gjatë ditës së hënë. Përafërsisht 40 për qind e aeroplanëve të këtij modeli tashmë janë vendosur jashtë përdorimit nga autoritetet e shteteve të ndryshme, përfshirë Kinën, ku operojnë 97 të tillë.
Sidoqoftë, autoritetet e Shteteve të Bashkuara të Amerikës kanë thënë se përdorimi i këtyre aeroplanëve është i sigurt, ndonëse nga rrëzimi i aeroplanit të kompanisë “Ethiopian Airlines” humbën jetën të gjithë 157 personat që ndodheshin brenda tij.
Në anën tjetër, zyrtarët e aviacionit në Australi dhe Singapor kanë deklaruar se e kanë ndaluar përdorimin e këtyre aeroplanëve për fluturime në mënyrë të përkohshme deri në marrjen e të dhënave shtesë për shkakun e rrëzimit të aeroplanit në Etiopi, shkruan “The Guardian”, transmeton Gazeta Express.
