Komandanti i policisë ka thënë se shpërthimi i parë ka ndodhur brenda katedrales ku ishin mbledhur një grumbull i njerëzve, ndërsa është pasuar me një shpërthim tjetër që ka ndodhur jashtë ndërtesës fetare. Ky zyrtar ka thënë se në mesin e viktimave ka civilë dhe pjesëtarë të forcave të sigurisë.

Në pamjet e publikuara në rrjetet sociale shihen trupat e shtrirë të viktimave në një rrugë të ngarkuar. Kjo katedrale është sulmuar me bomba edhe në të kaluarën. Vendi i ngjarjes është rrethuar nga veturat e blinduara të ushtrisë, ndërsa disa të plagosur janë dërguar në spital me helikopterë.

Ishulli i Jolos është përballur me trazira për një kohë të gjatë për shkak të pranisë së militantëve të grupit “Abu Sayyaf”, të cilët vlerësohen nga Filipinet dhe Shtetet e Bashkuara si organizatë terroriste. Ata janë të njohur për rrëmbime, sulme me bomba dhe vrasje me prerje koke, por ende nuk e kanë marrë përgjegjësinë për këtë sulm, shkruan “The Guardian”, transmeton Gazeta Express.