Irani do të vazhdojë të prodhojë raketa për mbrojtjen e vet dhe nuk e sheh këtë si shkelje të marrëveshjeve ndërkombëtare, ka thënë sot presidenti i Iranit, Hassan Rouhani, në një fjalim që u transmetua në televizionin shtetëror.
“Ne kemi prodhuar, jemi duke prodhuar dhe do të vazhdojmë të prodhojmë raketa, kjo nuk shkel asnjë marrëveshje ndërkombëtare”, ka thënë Rouhani, transmeton Express.
Komentet e tij vijnë pak ditë pasi Dhoma e Përfaqësuesve e SHBA-së votoi për sanksione të reja ndaj programit të raketave balistike të Iranit.
Shtetet e Bashkuara veçse kanë vendosur sanksione të njëanshme ndaj Iranit, duke thënë se testet e saj raketore e shkelin rezolutën e OKB-së, e cila i bën thirrje Teheranit të mos ndërmarrë aktivitete që ndërlidhen me raketa që janë në gjendje të bartin armë bërthamore.
Irani e mohon se dëshiron të posedojë armë bërthamore dhe thotë se nuk ka plane të prodhojë raketa bërthamore.
