Autoritetet në Madagaskar njoftojnë se numri i të vdekurve nga shpërthimi i murtajës është rritur në 124.
Zyra e Madagaskarit për Menaxhimin e Fatkeqësive njofton se janë identifikuar 1.192 raste të murtajës. Më shumë se dy të tretat e rasteve janë të formës më të fortë pneumonike, transmeton Express.
Kjo zyre thotë se më pak se 30% të njerëzve që kanë pasur kontakt me pacientët me murtajë mund të gjurmohen, gjë që e bën më të vështirë kontrollimin e përhapjes së kësaj sëmundje.
Murtaja është endemike në Madagaskar. Shpërthimi i kësaj sëmundjeje këtë vit është e pazakontë pasi ka mbërritur edhe në dy qytetet më të mëdha të vendit, Antananarivo dhe Toamasina.
