Kryetari i Trupit Gjykues i Departamentit të Krimeve të Rënda, në Gjykatën Themelore në Ferizaj, Ibrahim Idrizi, sot e hënë 30.06.2014, shpalli aktgjykimin ndaj të akuzuarit Sh.T, për kryerjen e veprës penale keqtrajtimi apo braktisja e fëmijës nga neni 250 par 5 lidhur me 2 të Kodit Penal të Kosovës si dhe veprën penale mbajtja në pronësi, kontroll, posedim të paautorizuar të armëve nga neni 374 par 2 lidhur me 1 të KPRK-se.
Kryetari i Trupit Gjykues, me rastin e shpalljes së aktgjykimit tha se, të akuzuarin Sh.T e shpall fajtor për shkak të kryerjes së veprës penale keqtrajtimi apo braktisja e fëmijës nga neni 250 par 5 lidhur me 2 të KPRK-së si dhe veprën penale mbajtja në pronësi, kontroll, posedim të paautorizuar të armëve nga neni 374 par 2 lidhur me 1 të KPRK-se,dhe gjykon me dënim burgimi në kohëzgjatje prej 4 vite e 6 muaj.
Ndryshe Sh.T, u akuzua se me datë 17.07.2013, rreth orës 15.20 , në Ferizaj, në banesën e tij në katin e 7-të, duke ushtruar autoritetin prindëror, e ka keqtrajtuar fëmijën e tij F.T i moshës 14 vjeçar, në atë mënyrë që ka përdorur masa fizike dhe mendore, në atë mënyrë që të dëmtuarit F.T në fillim ia ka lidhur duart me një shirit izolues – ngjitës dhe me një kabëll elektrike e ka rrahur duke e goditur në pjesë të ndryshme të trupit, në prani të fëmiut M.T dhe me pretekst se i njëjti i ka vjedhur një palë dara të ujit, e pastaj ka tentuar që t’ia lidh edhe këmbët, kështu që fëmiu nga frika ik dhe del në ballkonin e banesës, me duart e lidhura dhe tenton që të kaloj në terasën e fqiut, ku këmbën e majtë e vendos në murin e terasës ndërsa këmbën e djathtë në murin ndaras të terasës me fqiun, ndërkaq i akuzuari tenton që ta kap për maice por fëmija rrëshqet poshtë duke rënë në mbulojën e katit përdhese të banesës dhe merr lëndime të rënda trupore.
Ndërkohë në dënimin e shqiptuar do ti llogaritet koha e kaluar ne paraburgim dhe atë prej datës 17.07.2013. Ndërkohë i vazhdohet paraburgimi deri sa aktgjykimi të merr formën e prere por jo më shumë se dënimi i shqiptuar me aktgjykimin e datës 30.06.2014. /ferizajpress.com/