Ndeshja e djeshme, mes Manchester Unitedit dhe Southamptonit, në Old Trafford, pati shumë momente të cilat do të mbesin gjatë në mendjen e tifozëve të dy skuadrave, për shkak të golave të mrekullueshme që u shënuan në këtë ndeshje.
Para se ta shënonte golin e dytë të ndeshje, Romelu Lukaku i kishte lënë të gjithë gojëhapur, pasi Ryan Bertrand i Southamptonit e kishte bërë një ndërhyrje tejet të rrezikshme ndaj tij, transmeton Gazeta Express.
Megjithatë, për shkak të fizikut të jashtëzakonshëm, sulmuesi i Manchester Unitedit as që u rrëzua dhe vetëm e vazhdoi vrapin e tij, ndërsa Bertrand u rrëzua pas përplasjes me Lukakun. Gjyqtari e ndali ndeshjen dhe e ndëshkoi Bertrandin me karton të verdhë.
Manchester Unitedi e fitoi këtë ndeshje, me rezultat 3;2, në mënyrë mjaft dramatike, duke e shënuar golin e fitores afër fundit të ndeshjes, ndërsa Paul Pogba gaboi nga pika e penalltisë në minutat shtesë të lojës.
Fillimisht në epërsi kishin kaluar mysafirët, duke shënuar gol në minutën e 26-të. Por, “Djajtë e kuq” u treguan më të mirë në pjesën e dytë të ndeshjes, pasi që Andreas Pereira dhe Romelu Lukaku e shënuan nga një gol brenda gjashtë minutave.
Rezultati u barazua përsëri në minutën e 75-të përmes golit të shënuar nga James Ward-Prowse. Mirëpo, në minutën e 88-të, Lukaku e shënoi edhe golin e tij të dytë për këtë ndeshje. /Gazeta Express/
