Juventusi edhe zyrtarisht e ka emëruar Maurizio Sarrin në postin e trajnerit të skuadrës, menjëherë pasi u konfirmua largimi i tij nga Chelsea.

60-vjeçari iu bashkua Chelseat vetëm para një viti dhe kishte kontratë me klubin deri në vitin 2021, por ai e ndërpreu kontratën para kohe dhe tani i është bashkuar Juventusit, raporton Gazeta Express.

Sarri e ndërpreu kontratën me gjigantin anglez përmes agjentit shqiptar, Fali Ramadanit – përmes të cilit e kishte bërë të njëjtën edhe për t’u larguar nga Napoli para një viti – në mënyrë që t’i bashkohej Juves.

Nuk dihet se çfarë shume parash do t’ia paguajë Juventusi Chelseat si kompensim për lirimin e parakohshëm të Sarrit nga kontrata, pasi mediat italiane dhanë shifrën e 1.1 milionë funte, ndërsa ato angleze një shifër mes 5 deri në 10 milionë funte.

Sarri ka nënshkruar kontratë trevjeçare me Juventusin.

Ai do ta zëvendësojë Massimiliano Allegrin në postin e trajnerit të kampionit italian.

Sarri i ndihmoi Chelseat ta fitojë Ligën e Evropës dhe ta mbyllë sezonin në vendin e tretë në Premierligë në sezonin e tij të parë.

/Gazeta Express/