Manchester City ka konfirmuar se ish-mesfushori i Chelseat, Frank Lampard, i është bashkuar klubit në formë huazimi.

36-vjeçari i dha fund qëndrimit të tij 13-vjeçar në Stamford Bridge në korrik, pasi arriti marrëveshje për t’iu bashkuar skuadrës nga kampionati amerikan, New York City, si transferim i lirë, por fillimisht do t’i bashkohet kampionit të Ligës Premier deri në janar, para fillimit të sezonit të ri në MLS.

“T’i bashkohem Manchester Cityt është një mundësi fantastike për mua të vazhdoj të stërvitem dhe të luaj në nivel të lartë dhe të sigurohem se jam në formën më të mirë për New York Cityn”.

“Ky është një kapitull i ri në karrierën time dhe jam vërtet i ngazëllyer për këtë përvojë”.

“Jam takuar me Manuel dhe disa lojtarë në New York dhe mezi pres të shkoj në stërvitje dhe të jap kontributin tim për Manchester Cityn, para kalimit tim te New York”, ka deklaruar Lampard për faqen zyrtare të klubit të tij të ri. /Telegrafi/