Ylli i Romës, Stephan El Shaarawy, ka treguar se do të qëndrojë te klubi italian, përkundër spekulimeve se ai do të largohej për në Kinë.
25-vjeçari iu bashkua klubit të Romës verën e 2016-ës për 13 milionë euro nga Milani. Para se të transferohet përfundimisht në Romë, ai i ishte bashkuar skuadrës si huazim, përcjell Gazeta Express.
“Jam mirë këtu dhe nuk mendoj se do të largohen. Kam biseduar me klubin dhe trajnerin. Jam shumë i lumtur që do të qëndroj në Romë”, ka thënë italiani.
“Është ekip i mrekullueshëm, është normale që do të kem konkurrencë. Por për mua, nuk është problem. Unë kam përjetuar situata të ngjashme në të kaluarën. Kjo është puna jonë dhe tani jemi të gatshëm të japim më të mirën për Romën”.
“Drejtuesit e dinë se çfarë dua unë. Kur kam diçka për të thënë, e them atë sinqerisht, por në të njëjtën kohë e di se çfarë duan fansat. Spekulimet nuk ishin problem për mua, edhe kur ishin të pavërteta”. /Gazeta Express/