Taulant Xhaka ka thënë se dëshiron të ribashkohet me vëllain e vet, Granitin, në të ardhmen. Po ashtu, ai ka zbuluar se ëndrra e mesfushorit të Arsenalit është të kthehet në Basel një ditë.
Taulanti, 26-vjeçar, ka luajtur kundër vëllait të vet më të vogël kur Baseli u takua me Arsenalin në Ligë të Kampionëve sezonin e kaluar, si dhe dy herë tjera në Euro 2016, me Xhakën e madh që e përfaqësoi Kombëtaren e Shqipërisë dhe Granitin atë të Zvicrës, transmeton Express.
Duke folur ekskluzivisht për Goal.com, ylli i Baselit e ka pranuar se ambicie e tij është të luajë përkrah vëllait në mesfushë.
“I telefonoj Granitit katër herë në javë. Flasim për gjëra në përgjithësi, jo vetëm për futboll. Po ashtu, për shkak se ai po kalon nëpër një periudhë të vështirë me Arsenalin. Shkëmbejmë këshilla për ta përmirësuar veten. Ai më ndihmon mua dhe unë e ndihmoj atë”, ka thënë Taulanti.
