Mesfushori i Barcelonës, Xavi Hernandez, ka zbuluar se ai ka vendosur të pensionohet nga kombëtarja spanjolle në moshën 34 vjeçare.

“Kam vendosur të largohem nga ekipi kombëtar – kohës time i ka ardhur fundi”, ka zbuluar mesfushori në një konferencë shtypi.

“I jam falënderues çdokujt në federatë. Ka qenë një kohë e mahnitshme për aq shumë vite dhe me aq shumë suksese”.

“Po largohem nga ekipi plot krenari dhe u dëshiroj atyre të gjitha të mirat. Tash do t’i përcjell ata si tifoz”, ka shtuar kapiteni i Barcelonës.

Xavi ishte lojtar kyç kur Spanja fitoi dy kampionate evropiane radhazi në vitin 2008 dhe 2012, si dhe Botërorin e vitit 2010, dhe vendos të pensionohet pas 133 ndeshjes dhe 13 golash.

Xavi u emërua lojtari më i mirë në Euro 2008, kur Spanja fitoi trofeun e parë të madh që nga viti 1964. Megjithatë ai dhe kombëtarja e tij zhgënjyen në Botërorin e këtij viti, Brazili 2014, duke u eliminuar që në fazën e grupeve. /Telegrafi/