Kryetari i Shoqatës së Malazezëve të Kosovës, Slobodan Vujiçiq, ka thënë se ka biseduar me kryetarin e Aleancës për Ardhmërinë e Kosovës, Ramush Haradinaj, i cili – siç thotë ai – nuk është kundër Demarkacionit me Malin e Zi “por është i interesuar për gjetjen e një zgjidhjeje”.

Vujiçiq po ashtu komentoi edhe veprimin e Lëvizjes Vetëvendosje, të cilën e quajti “jo shumë të menduar”.

Përfaqësuesi i komunitetit malazez në Kosovë tha se për dallim nga VV që është kundër Demarkacionit, e njëjta gjë nuk mund të thuhet për AAK-në.

“Ramush Haradinaj nuk është kundër Demarkacionit, ai është për gjetjen e modaliteteve dhe një zgjidhjeje të pranueshme për të dyja vendet [Malin e Zi dhe Kosovës]”, deklaroi Vujiçiq në Info Magazine të Klan Kosovës.

Haradinaj më parë ka dalë hapur kundër Demarkacionit me Malin e Zi, madje ka organizuar disa protesta për këtë çështje, të cilën e ka kundërshtuar ashpër.