Kandidatja për kryeministre nga Lidhja Demokratike e Kosovës, Vjosa Osmani ka deklaruar se asnjë cent i taksapaguesve nuk do të keqpërdoret në qeverisjen e saj, kurse, nuk do të amnistohen ata që janë pasuruar në kurriz të popullit.
Osmani në tubim me qytetarët në Lipjan, ka thënë se në qeverinë e re do të menaxhohet me përgjegjësi paraja publike dhe nuk do të lejohet të keqpërdoret asnjë cent i buxhetit të shtetit.
Ajo ka akuzuar partitë tjera se po ndjellin frikë, po shpërndajnë propagandë e mashtrime, kurse LDK po shpërndanë shpresën dhe besimin.
“Për dallim nga të tjerët, ju e dini se ne nuk e keqpërdorim asnjë cent tuajin, asnjë cent të taksapaguesve më nuk do të keqpërdorohet, ne nuk do t’i japim amnisti atyre që themelet e tyre, të partive të tyre i ndërtuan mbi krim e në korrupsion, atyre që nuk mund ta dëshmojnë se si u bën milioner brenda natës, sepse pasuria që nuk dihet si është krijuar, është pasuri e vjedhur nga populli, është pasuri e vjedhur nga ju. Oponentët tanë politik po dëshmojnë panikun prej humbjes së thellë, kanë dal e po shpërndajnë premtime mashtruese, po shpifin sa po munden për ne po shpërndajnë po kush nuk po iu beson, asnjë lipjanas nuk po iu beson. Ata po shpifin sepse e dinë siç e dimë edhe ne që ne kemi me fitu dhe bindshëm, e kur të fitojmë, PDK-në do ta qojmë në opozitë të gjatë”, tha ajo.
Gjatë tubimit në qendër të Lipjanit, Osmani tha se askush më mirë se qytetarët e Lipjanit, nuk e di dallimin mes keqqeverisjes dhe qeverisjes së mirë.