Christian Vieri ka pohuar se Juventus do ta fitojë Serie A sezonin e ardhshëm dhe se Inter do të rikthehet, ndërsa Milanit i mungojnë kampionët.
Në një intervistë për Corriere dello Sport, Vieri e ka pranuar se Napolit i mungon cinizmi dhe vazhdimësia, transmeton Express.
Vieri nuk mund ta imagjinojë Romën pa Francesco Tottin. Ish-futbollisti i Juventusit, Interit dhe Milanit ka thënë se ky afat kalimtar veror është i mërzitshëm.
“Kush do ta fitojë Serie A sezonin e ardhshëm? Kam frikë se nuk do të ndryshojë. Juve do ta fitojë përsëri,” ka thënë ish-sulmuesi italian.
“Interi është i gatshëm të sfidojë me Suning? Do të jetë, por duhet të punojë fortë në afatin kalimtar veror dhe të blejë lojtarë të rëndësishëm të cilët mund ta bëjnë dallimin. Do të rikthehet ai Interi i vjetër,” ka theksuar Vieri.
Për Milanin, ai ka pohuar se i mungojnë lojtarë kampionë në skuadër.
“Sa i përket Milanit, kam dyshime. E kanë marrë një sulmues të mirë, Andre Silva, të cilin e pëlqej, por nuk pres që Milan të sjellë lojtarë të mëdhenj për të cilët ka nevojë për t’u rikthyer në krye. Milan ka nevojë për kampionë.,” ka shtuar ai.