“Nuk do të jem më trajner i Real Madrid, ky është momenti i duhur për të lënë skuadrën e cila ka nevojë për një ndryshim që të vijojë të fitojë. E di që ky është një vendim që tifozët nuk do e kuptojnë por mendoj se kjo është më e mira”, tha Zinedine Zidane në lamtumirën e tij të papritur, që shtangu gjithë botën.

Në fillim nuk e kuptuan edhe lojtarët, që mbetën të habitur me vendimin e njeriut që shkroi histori duke fituar tre herë me radhë Ligën e Kampionëve dhe vazhdojnë të jenë të habitur edhe sot.

Por, duke menduar më shumë, Raphael Varane është rikthyer të flasë dhe sipas tij, “mund të ketë diçka të vërtetë në ato që tha Zidane”.

“Është e vërtetë se një ndryshim i vogël mund të jetë pozitiv për të gjithë. Do të shohim më vonë nëse Zidane kishte të drejtë, sezoni ynë në Ligë mund ta tregojë këtë. Ndoshta do të kemi nevojë për të gjatë sezonit, por do të shohim”, tha Varane.

“Ai i sheh gjërat dhe nëse e ka thënë këtë, duhet të ketë diçka të vërtetë këtu”.

“Ne mësuam për largimin vetëm pak para konferencës ku na u dërguan mesazhe të gjithë lojtarëve dhe natyrisht ishim të habitur, të shokuar, ishte moment shumë zhgënjyes, pak surprizë. Ajo çfarë ai bëri në Madrid, është thjesht e mrekullueshme”, shtoi Varane. /Gazeta Express/