UEFA pritet të lajmërojë më 3 dhjetor se Video Assistant Referee (VAR) do të përdoret nga ndeshjet pas fazës së grupeve të këtij sezoni të Ligës së Kampionëve. Tani nga të gjitha garat e mëdha evropiane, vetëm Premierliga mbetet pa këtë teknologji.
VAR-i fillimisht nuk do të përdorej deri në sezonin e ardhshëm, por Komiteti Ekzekutiv i UEFA-s dëshiron ta fillojë përdorimin e kësaj teknologji që nga ndeshjet e shkurtit të këtij sezoni, raporton The Times, transmeton Gazeta Express.
Mungesa e VAR-it në Ligën e Kampionëve u vërejt më së shumti pas penalltisë së akorduar në ndeshjes mes Manchester Cityt dhe Shakhtar Donetskit, kur gjyqtari e dha një penallti për anglezët pasi që Raheem Sterling u pengua në barin e fushës dhe u rrëzua.
VAR-i do të përdoret nga 1/8 e finales së këtij sezoni, ndërsa në Evropa Ligë nga sezoni i ardhshëm. Për këtë gjë do të merret vendimi më 3 dhjetor, kur mbahet takimi i Komitetit Ekzekutiv të UEFA-s në Dublin.
Edhe klubet e Premierligës janë pajtuar, pas një takimi, që ta përdorin Video Assistant Referee në këtë garë duke filluar nga sezoni i ardhshëm. Klubet ende nuk janë pajtuar për detajet e kësaj marrëveshje, mirëpo është bërë e ditur se kjo teknologji do të përdoret nga sezoni i ardhshëm. /Gazeta Express/
