Louis van Gaal i ka kritikuar përsëri taktikat e trajnerit të Manchester Unitedit, Ole Gunnar Solskjaer, duke thënë se norvegjezi e parkon autobusin mu para hundëve të portierit David de Gea.
Unitedi e emëroi Solskjaerin trajner permanent muajin e kaluar, i cili nënshkroi kontratë trevjeçare, pas një fillimi tejet mbresëlënës në Old Trafford, megjithatë, që prej atëherë “Djajtë e kuq” kanë pësuar rënie të dukshme, transmeton Gazeta Express.
Unitedi – i gjashti në Premierligë me dy pikë larg vendit të katërt – i ka humbur pesë nga shtatë ndeshjet e fundit në të gjitha garat.
Gjiganti anglez u eliminua nga Liga e Kampionëve në mesjavë pasi u mposht nga Barcelona në çerekfinale me rezultat të përgjithshëm 4:0.
Ish-trajneri i Manchester Unitedit, Van Gaal, i cili edhe në fillim e vuri në pikëpyetje qasjen e Solskjaerit pasi norvegjezi e zëvendësoi Jose Mourinhos e shkarkuar në dhjetor, këmbëngul se i preferuari i klubit ka taktika defensive.
“E kuptoj se Ole ka pasur ndikim në fillim, sepse Unitedi ishte i nënti në renditje kur ai e mori drejtimin e skuadrës dhe ekipi ishte asgjë. Unitedi po luante anti-futboll, siç e quaj unë, por mos mendoni se Ole frikësohet ta parkojë autobusin – ai është më defensiv seç mendoni ju”, tha Van Gaal.
“Jam duke e përcjell ekipin, sepse unë ende e përcjell Unitedin dhe Ole e parkoi autobusin kundër Arsenalit. E bëri kundër Tottenhamit në ligë. E bëri kundër PSG-së dhe Barcelonës në Ligën e Kampionëve”, theksoi ai.
“Ai luan kështu kundër secilit ekip të madh. Ai e vë theksin më shumë në futboll mbrojtës se në futboll sulmues apo dominues. Unë e quaj parkim të autobusit këtë, shtoi ai. /Gazeta Express/