Kryetari i Aleancës për Ardhmërinë e Kosovës, Ramush Haradinaj ka vlerësuar se viti që po e lëmë pas, ishte vit sfidues për Kosovën.

Sipas tij, viti 2015 ishte vit që e rëndoi edhe më shumë jetën e qytetarit, nga një situatë dramatike dhe me regres ekonomik – ishte një vit i rëndë dhe pa përmbajtjen e duhur.

Haradinaj, në urimin e tij për Vitin e Ri, ka thënë se si në vitin që shkoi, edhe në këtë që po vjen, duhet të përballemi me rrezikun e madh të keqqeverisjes dhe me korrupsionin galopant që e ka përfshi vendin.

“Unë besoj se bashkërisht do ta marrim drejtimin e duhur si Kosovë”, ka thënë Haradinaj.

Ai gjithashtu ka shtuar se viti 2016 do të jetë vit i vendimeve jo të lehta dhe i kthesës për Kosovën.

“Vit në të cilin qytetarët do të vendosin për ta ndryshuar këtë gjendje të rëndë që e ka shkaktuar qeverisja e papërgjegjshme. Besoj dhe jam i bindur se Kosova ka njerëz të cilët mund ta ndryshojnë këtë gjendje të keqe”.

“Me shpresë se do të jemi bashkë në këtë kauzë për vendin, më lejoni që në emër të AAK-së, familjes sime dhe në emrin tim, të gjithë juve dhe familjeve tuaja, t’iu uroj çdo të mire në Vitin e Ri 2016-të!
Më shumë begati, shëndet e mirëqenie për shqiptarët kudo që janë!” /Telegrafi/