Gjatë vizitës së kryeministrit grek, Aleksis Tsipras në Beograd, ku u takua me homologun e tij serb, por edhe me presidentin serb, Tomislav Nikolic, kanë folur edhe për Kosovë. Tsipras në takim me Nikolic ka thënë se askush nuk mundet të na bëjë presion mbi njohjen e Kosovës, ku ka qartësuar se e mbështesin Serbinë në qëndrimin e saj ndaj Kosovës
Presidenti serb, Tomislav Nikolic ka thënë se Serbia i sheh si vende të çmuara shtetet që nuk e kanë njohur pavarësinë e Kosovës. Njashtu edhe kryeministri i Greqisë, Aleksis Tsipras ka thënë se Qeveria greke e mbështet Serbinë në qëndrimin e saj ndaj Kosovës, transmeton Gazeta Express.
Tsipras the se Greqia dëshiron të ndihmojë në zgjidhjen e çështjes së Kosovës. Ai ka theksuar se Greqia mbështet hyrjen e Serbisë në Bashkimin Europian, pavarësisht vështirësive me të cilat përballet vendi. Ai shprehu besimin se anëtarësimi i plotë i Serbisë në BE do të kontribuojë në forcimin e paqes dhe stabilitetit në Ballkan.
“Ne duam të ndihmojmë në zgjidhjen e çështjes së Kosovës, pasi që vetëm kështu mund të ruhet stabiliteti për Serbinë. Dua të theksoj se askush nuk mund të na bëjë presion për njohjen e Kosovës”, ka thënë Tsipras në Beograd.
Nikolic dhe Tsipras shprehën dëshirën që marrëdhëniet në mes të Serbisë dhe Greqisë të forcohen edhe më shumë, sidomos në ekonomi.
Presidenti serb Tomislav Nikolic shtoi se marrëdhëniet dypalëshe janë të sinqerta dhe miqësore, derisa theksoi se Serbia i sheh si të vlefshme vendet që nuk e kanë njohur pavarësinë e Kosovës. /GazetaExpress/
