Zëvendëskryeministri i Kosovës, Hashim Thaçi, në fjalimin e tij në seancën e improvizuar të Kuvendit të Kosovës, veprimet e opozitës i ka quajtur kriminale dhe të çmendura.

“U ballafaquam me një sulm jo vetëm kundër koalicionit qeverisës, por me veprime kriminale të çmendura që po tentojnë punën dhe funksionimin e Kuvendit të Kosovës”, ka thënë Thaçi.

Megjithatë Thaçi ka thënë se koalicioni është i vendosur për të çuar më tej agjendën e Kosovës, sikurse që është edhe ai i buxhetit të Kosovës.

“Duke mos pasur argumentet për debat, këta liderë opozitarë na kanë sjellë në situatë aspak të lakmueshme”, ka vlerësuar Thaçi.

Në kuadër të kësaj, ai ka bërë thirrje për zero tolerancë për veprimet e opozitës.

“Vlerësoj se duke respektuar Kushtetutën, ligjet, procesin zgjedhor…, mendoj se asnjë moment nuk duhet të ketë hezitime se si do të vazhdojmë më tutje. Askush nuk do të mund ta bllokojë Kuvendin e Kosovës. Dhe toleranca ndaj këtyre kriminale duhet të jetë zero”, ka përfunduar Thaçi. /Telegrafi/