Zëvendëskryeministri i Kosovës, Hashim Thaçi, tha se “dhuna në protestën e sotme është mesazh i keq për Kosovën”. Kjo, sipas tij, “do të ndikojë edhe në procesin e liberalizimit të vizave”.

“Dhuna e sotme e përsëritur nga partitë opozitare është mesazhi më i keq i mundshëm për Kosovën dhe qytetarët e saj. Kjo dhunë është cenim i rendit kushtetues e ligjor. Është cenim i procesit për liberalizimin e vizave, goditje e re për themelimin e Forcave të Armatosura të Kosovës, për zhvillimin ekonomik dhe për ardhjen e investitorëve të huaj. Dhuna e përsëritur sot është atak edhe i mbështetjes së partnerëve të Kosovës: SHBA-ve, BE-së dhe NATO-s. Kjo dhunë opozitare entuziazmon kundërshtarët e konsolidimit të shtetit të Kosovës”, ka shkruar Thaçi në profilin e tij në Facebook.