Erëza Muçolli është shqiptarja tetëvjeçare, e cila nuk ia lëshon rrugën këngëtares së famshme Indila, për kah kualiteti i këndimit.
Tashmë edhe Erëza është bërë e njohur në Francë, pasi këndoi në shumë gara dhe ishte personazh i kronikave televizive franceze për talentin e saj.
“Erëza ka filluar të këndojë, ende pa folur. Gjithë kohës në veturë ajo i ka dëgjuar e pastaj i ka përsëritur këngët. Ndoshta e ka trashëguar prej neve talentin. Edhe unë edhe gruaja përpara se të ikim në Francë, kemi qenë pjesë e shoqatave kulturore artistike në vend”, ka treguar për televizionin Klan Kosova, babai i saj me prejardhje nga Zabeli i Drenasit.
Erëza, e cila ka filluar të këndojë që në moshën dyvjeçare, është kosovarja e parë që do të jetë pjesë e kompeticionit francez “Franca gjen talentin” që do të nis me 8 shtator të këtij viti. Mbase aty do të paraqitet edhe me piano pasi është edhe instrumentiste e mirë.
Përgjatë këtyre viteve, Erza ka organizuar shumë paraqitje solo, duke kënduar në gjuhën frënge, angleze por edhe shqipe. /Telegrafi/