Jo me shumë mund, Real Madridi e ka mposhtur Liverpoolin para tifozëve në Anfield (3-0) në ndeshjen e vlefshme për xhiron e tretë në kuadër të Grupit B të Ligës së Kampionëve.

Nikoqirët nuk e filluan keq sfidën, mirëpo shumë shpejt erdhi në pah fuqia mbretërore.

Një superasistim të James Rodrigez e shfrytëzoi Cristiano Ronaldo për të thyer tabunë dhe për ta shënuar golin e tij të parë në Anfield dhe të tretin në përgjithësi kundër Redsave (23’). Në ndërkohë ky ishte goli i 70-të në Ligën e Kampionëve (një më pak se rekordmeni Raul).

Pas gjysmë ore lojë, Toni Kroos dërgoi një krosim të bukur në zonë dhe Karim Benzema shënoi me kokë (30’).

Sulmuesi francez e shënoi edhe golin e dytë personal (41’) dhe vulosi fatin e kësaj ndeshjeje që në pjesën e parë.

Në gjysmën e dytë, vendasit u përpoqën të ndryshonin diçka, mirëpo nuk mund të bënin asgjë përballë ekipit të Carlo Ancelottit që nuk shënoi gola të tjerë.

Në ndeshjen tjetër të Grupit B, Baseli ka pranuar gol në minutat e fundit dhe e ka humbur ndeshjen nga Ludogorets Razgrad me rezultat 1-0.

Real Madridi, nga tri ndeshje ka tri fitore, pra nëntë pikë. Tri skuadrat tjera kanë nga tri pikë, pas tri xhirove të para. /Telegrafi/