Partia Demokratike e Kosovës është vënë në kërkim të partnerëve për bashkëqeverisje e në kërkim të numrave në Kuvend.
Zyrtarë të PDK-së dhe të Nisma për Kosovën janë takuar për të biseduar mundësinë e bashkëqeverisjes. Burime brenda takimit i kanë thanë televizionit Rrokum se oferta që i është bërë Nismës së Fatmir Limajt nga ish-bashkëpartiakët e tij, është hiç më pak se tetë ministri.
Sipas këtij burimi, zyrtarët e PDK-së u kanë thanë atyre të Nismës se përveç Ministrisë së Financave, mund ta zgjedhin cilëndo nga ministritë tjera.
Takimin dhe ofertën e PDK-së e ka konfirmuar për televizionin Rrokum edhe sekretari i Nisma-s, Fitim Selimi.
Ndonëse Selimi ka hezituar të flas me shifra për numrin e ministrive të ofruara, ai ka thënë se në takimet që janë zhvilluar ndërmjet përfaqësuesve kyç të të dyja partive, kanë marrë oferta për koalicion.
Por, sipas Selimit, pavarësisht kësaj oferte që kanë marrë, Nisma për Kosovën do të vazhdojë që t’i qëndrojë besnik koalicionit të bllokut opozitar, të nënshkruar me dy partitë e tjera, LDK e AAK.