Ministri i Punëve të Brendshme të Kosovës, Xhelal Sveçla ka njoftuar se Policia sot ka zbuluar një laborator droge në veriun e Mitrovicës.

Postimit në Facebook, Sveçla ia ka bashkangjitur edhe pamjet brenda laboratorit me 30 kg drogë të llojit marihuanë.

Ai bëri të ditur se gjatë këtij aksioni janë arrestuar dy të dyshuar shtetas të Kosovës me etni serbi.

“Ky është aksioni i dytë i suksesshëm i Policisë në veriun e vendit vetëm brenda kësaj jave pas atij për bllokimin e rrugëve të kontrabandës. Ashtu siç jemi zotuar se do të luftojmë kriminalitetin në çdo cep të Republikës do të vazhdojmë pa pushim, pa kompromis. Vendi ynë do të bëhet vend i qetë dhe i sigurt për gjithë qytetarët e saj”, thuhet në shkrimin e tij.