Janë suspenduar dy oficerë të policisë gjermane, nën dyshimin se kishin kontakte me një ekstremist anti-qeveritar, i cili e plagosi për vdekje një oficer tjetër gjatë një bastisje në shtëpinë e tij muajin që shkoi.
Prokurorët dhe policia në Bavari kanë thënë sot se dy oficerët, të cilët nuk janë identifikuar, kishin krijuar kontakte me të dyshuarin 49-vjeçar, para incidentit me të shtëna më 19 tetor, në qytetin Georgensgmuend, transmeton Express.
Ata nuk e kanë shpjeguar natyrën e kontakteve të oficerëve me të dyshuarin, por treguan se të dy oficerët janë suspenduar me efekt të menjëhershëm.
I dyshuari hapi zjarr ndaj policisë, në momentin kur oficerët po tentonin t’ia konfiskonin armët.
Ai ishte përkrahës i Lëvizjes së Qytetarëve “Reich”, e cila refuzon ta njohë autoritetin e Republikës Federale të Gjermanisë së pasluftës./Express/
