Deklarata, që i kanë dhënë përfaqësuesit e partive të koalicionit, por edhe vetë presidenti, Hashim Thaçi, se shumë shpejt Kosova do ta ketë ushtrinë e saj që të jetë e standardeve të NATO-s po dalin të jenë vetëm “fasadë” politike.
Kjo, pasi asnjëri nga liderët e koalicionit nuk ka biseduar me Listën Serbe për t’i harmonizuar qëndrimet rreth ndryshimeve kushtetuese, që janë të nevojshme për transformimin e FSK-së në FAK.
Përfaqësuesi i Listës Serbe, Branimir Stojanoviq, ka thënë se qëndrimi i kësaj liste nuk ka ndryshuar sa i përket transformimit të FSK-së.
Megjithatë, ai thotë se për çështjen e ushtrisë janë të gatshëm të bisedojnë me përfaqësuesit e Qeverisë së Kosovës, por vetëm në takim zyrtar e jo përmes medieve. Kështu ai ka lënë të kuptohet se këtij subjekti politik asnjëherë nuk i është kërkuar mbështetja për formimin e ushtrisë së Kosovës.
Një gjë e tillë nuk është hedhur poshtë nga Zyra e Kryeministrit. Ndërsa përfaqësuesit e partive opozitare në vend thonë se deklarimet dhe premtimet për formimin e ushtrisë janë bërë vetëm për konsum ditor dhe se Qeveria nuk po angazhohet në këtë drejtim.
“Ne jemi në dispozicion të flasim, jo nëpërmes mediave, siç po bëhet tani, por në mënyrë shumë konstruktive, në zyrë, ashtu siç bëhet kjo punë”, ka thënë Stojanoviq. /Zëri/
